En Rekordufmarsch wartet am Bahnhof, fascht wie a de GV
D`Agnes wird darob nöd schlau
Lits a de Toureleiterin, am e feine Mittagässe im Ghöch
oder isch die hütig Wanderig eifach nu znöch
De Räge hät sich rechtzitig verzoge
Er isch am Seniore Mittwoch wieder emal wohlerzoge
Nach em obligate Seniore K+G im Lindepub in Bäretswil
wandered mer am Bach entlang, links und rächts nüt als «….wil»
Gibswil, Ringwil, Bettswil, Hinterbettswil, Wirzwil, Wilgupf
Jetzt fählt de Historiker Rohner, de chönt die gschichtlich Namensgebig locker erchläre
Ich hingäge mues zum dem Thema zerst «Wikipedia» awähle
Die erchläred dir, dass sei abgleitet vo «Weiler» oder «Villa»
Ich ha da mini Zwifel, ob ich das richtig nahgschlage ha
und mues drum nomal uf e Wanderig mit em Hanspeter ga
Uf Wanderige wie hüt chamer dänn sötig Frage stelle
D’Antworte tüend eim dänn hoffentlich echli erhelle
Meistens gats aber um ganz normali Sache
E paar verzelled bigoscht scho vom Wienachtsguetzli bache
De eint isch i de Politik diheime
De anderi kännt sich us bi de Stüüre
Und en Dritte zahlt zviel Gebühre
D’Fraue verzelled viel vo de Enkel
Churz vor em Ghöch zwickts eine scho am Oberschänkel
Bim Mittagässe gits dänn a eusem Tisch e chlini Panne
Bstellt händs 9x Fleischchäs, de Choch haut aber 9 Fleischvögel i d’Pfanne
Trotzdem händ alli die Vögel gnosse
und em Fleischchäs glaub ich kei Träne nagosse
Nach em Mittagässe bim Abstieg uf Steg
das isch de vo de Agnes erwähnti aspruchsvolle Weg
Er isch seifig und schliferig und mer sind froh um euseri Stöck
Z’Wädeschwil chömet alli zfride a und guet versorget
Und scho gli isch wieder morget